Weëd

Ieëtsjte Krisdaag. Tswaide, dreide, veerde, vunnefde krisdaag. Tsiet va lempjer, keëtse. De daag lenge ziech alwerm. Lanksaam roetsjt Krismes in ’t Nuijoar. Lu óngerweëgs noa bezuk. Of bij hön heem.’t Hoes vol erinneroeng. Um tse dele. D’r pap veult die wermde va zieng kinger, de famillieë, vrung um ziech hin. Preuft ’t jemis. Wie kloar d’r himmel óch is. Wil de sjtere i jen heng han.
Huet d’r laach va kinger in de krisvakans. Hofnoeng óp sjneivräud. Heë deelt ‘t.
D’r projram in ’t tejater, ‘Bouw krismes’ hat ‘m jód jedoa. D’r krisman róffet: ‘Hohoho.’ D’r oeësterhaas: ‘Hupshupshups.’ D’r Tsinterkloas versjoos va kluur. Zoeë jong me ’t joar rónk. Mit d’r Ieëtsjte Weltkrig. Mit de lu óp de vlóch va noen. Inne sjwerver deë zie jeluk vingt in inne dreksbak. En kweer durch al de tsiete, ’t Stille Nacht. De lu in d’r zaal zónge ’t va hatse mit. Umdat ’t mieë is wie kingertsiet. Umdat ‘t inne waeg noa vrid kan weëde. Oeëts vrid zieë.
Wen ze kót vuur middenaat noa heem junt, zunt ze sjtil durch deep jeveul. Mar óch d’r laach um d’r Pepsicola sjponsor van d’r krisman. En d’r Durex vuur d’r jepópde uul.
Hinger e reklaamsjild knalt e bumpje oeseree. ’t Nuijoar is óngerweëgs. ’t Is ‘Bouw Krismes.’ De kate vuur ’t nieëks joar ‘Bouw Krismes’ junt ze werm besjtelle. D’rbij zieë. Vuur wat ’t diech weëd is.