Zude

Heë hat jet sjilderije bij de vinster jezatsd. D’r Jean jeet an duur um ze tse bekieke. Vanoes d’r blik vuur lu die verbij junt. Zoeë lieët e ziech hinger. In de sjilderije. Jemoald in de vrugjoar- en zommertsiet. De koens va blieve. Dat is de weëd. De kraf va komponere, sjildere, sjrieve. Vuur al die moezieker, zengere, artieste. Kuunsler sjtunt boave de tsiet. Ver-ieëwieje ziech. Dat neëme ze allenäu mit.  De lu die vertbij junt. Die sjtoa blieve. Ziech losse mitdrieve.
D’r Jean jeet werm eri. De kóffere jepakd. Sjleet de vluejele oes. Lieët zie heem hinger. Vingt zie heem in ’t zude. E heem oane end. I verf. E ónendlieg sjilderij. Joa, heë zal ’t moale. Ummer werm. I jeneratsiejoeëne. Mam, pap, kink. Oma, opa, klingkink. Danse in ‘ne krink. Ze zinge uvver bejin en end inee. In ing leëvenslies.
An d’r rank van ’t dörp sjtópt e nog effe. Kiekt nog ins um. Noa zieng vrugjoar-en zommertsiet. Drieënt ’t nit d’r ruk tsouw. Nimt ’t mit noa ’t zude.